საზოგადოებამ სწორად უნდა აირჩიოს ის ადგილი, სადაც უნდა დადგეს და რა გადაწყვეტილებაც უნდა მიიღოს, ამიტომ მას უნდა ჰქონდეს სწორი ინფორმაცია და ჩვენ ბოლომდე მოვემსახურებით ამას, – ამის შესახებ დამოუკიდებელმა დეპუტატმა დიმიტრი ხუნდაძემ „ქრონიკასთან“ განაცხადა.
„ფაქტია, რომ ჩვენი პოზიციონერობით ძალიან ბევრი ფაქტი, რომელიც იყო ქილიკის და ეჭვის საფუძველი, გამართლდა: 6-თვეში ვალდებულებების შესრულება, ამ ვადამ შემდეგ გადაიწია; მოსამართლის საკითხი, ხომ არ იყო ეს საფუძველი მისი სანქცირების; იგივე ეს [ბიძინა ივანიშვილის და კელი დეგნანის] შეხვედრა, როცა ყველა ამტკიცებდა რომ არ შემდგარა ეს შეხვედრა. პოლიტიკოსები გამოდიოდნენ და სისულელეს არქმევდნენ ამას. აღმოჩნდა, რომ ეს არ არის სისულელე, აღმოჩნდა, რომ ეს მართლაც ხაფანგია და არ არის ეს ვალდებულებების უმოკლესი და ერთადერთი გზა. თურმე არ არის სისულელე, რომ მოსამართლე დასანქცირდა საკუთარი გადაწყვეტილების გამო. რისკები რეალურია, რისკები არსებობს და ამას სჭირდება დაზღვევა. მთავარი დაზღვევის ბარათი უნდა ჰქონდეს საზოგადოებას და მან რომ სწორად აირჩიოს ის ადგილი, სადაც უნდა დადგეს და რა გადაწყვეტილება უნდა მიიღოს, მას უნდა ჰქონდეს სწორი ინფორმაცია და ჩვენ ბოლომდე მოვემსახურებით ამას“, – აღნიშნა ხუნდაძემ.
საქართველოს ყოფილი პრემიერ-მინისტრი, „ქართული ოცნების“ დამფუძნებელი ბიძინა ივანიშვილი განცხადებას ავრცელებს, სადაც ნათქვამია, რომ კელი დეგნანთან მისი შეხვედრა ელჩის თხოვნით 21 მარტს ნამდვილად შედგა, რომელიც დაახლოებით სამ საათს გაგრძელდა.