„რაც შეეხება საბჭოების მუშაობას, რომლებიც წყვეტენ პირობით ვადამდე გათავისუფლების ან სხვა სასჯელით ჩანაცვლების საკითხებს, შემიძლია გითხრათ სტატისტიკა: შარშან 2025 წელს დაახლოებით 130 პირი გათავისუფლდა ვადაზე ადრე, დღეს 9 თვის მონაცემებით 800-ზე მეტია. ჩვენ გავააქტიურეთ ამ საბჭოების მუშაობა“,- ამის შესახებ იუსტიციის მინისტრმა პაატა სალიამ ტელეკომპანია „იმედის“ ეთერში განაცხადა.
მინისტრის განმარტებით, პირობით ვადამდე გათავისუფლების პროცესი კანონმდებლობით განსაზღვრული კრიტერიუმებისა და ვადების შესაბამისად მიმდინარეობს და მისი პროცედურები გამჭვირვალეა.
„გაწერილია, როგორ მუშაობენ კომისიები, რა კრიტერიუმებს უნდა აკმაყოფილებდნენ, კანონით განსაზღვრულია ვადები, როდის შეუძლია პატიმარს მიმართოს კომისიას გათავისუფლების თხოვნით. ეს ყველაფერი გაწერილი და გამჭვირვალეა“, — აღნიშნა იუსტიციის მინისტრმა.
პაატა სალიას განცხადებით, აღნიშნულ პროცესთან დაკავშირებით იუსტიციის სამინისტროში პატიმრების მხრიდან გაუმჭვირვალობასთან დაკავშირებული პრეტენზიები არ შესულა.
,,სამინისტროს პატიმრისგან არ მიუღია არცერთი წერილი, სადაც საუბარი იქნებოდა იმაზე, რომ პროცესი გაუმჭვირვალეა. ამასთან დაკავშირებით პრეტენზია არასდროს მიგვიღია“, — განაცხადა პაატა სალიამ.