მოლდოვაში ევროკავშირის წარმომადგენლობის ხელმძღვანელი იანის მაჟეიქსი აცხადებს, რომ ბრიუსელი კიშინიოვისგან რუსეთის წინააღმდეგ დაწესებული სანქციებისთვის მიერთებას არ ითხოვს, თუმცა ამ მიმართულებით წინსვლით „მოხარული იქნება“. ამის შესახებ მაჟეიქსმა ადგილობრივ მედიას განუცხადა.
„ევროკავშირი არ ითხოვს – ჩვენ გვესმის, რომ მოლდოვა სპეციფიკურ სიტუაციაშია და ზოგჯერ შეუძლებელი იყო ამა თუ იმ ნაბიჯებისთვის მიერთება. თუმცა ევროკავშირისთვის მნიშვნელოვანია ისიც, როგორი იქნება წინსვლა ამ მიმართულებით“, – აღნიშნავს დიპლომატი.
მაჟეიქსის თქმით, ევროკავშირის წევრობის კანდიდატი ქვეყნებისგან ყველა მოელის, რომ ისინი თანდათან დაუახლოებენ საკუთარ საგარეო პოლიტიკას ევროკავშირის პოლიტიკას.
„მკაცრი მოთხოვნა არ არსებობს, მაგრამ მოხარულები ვიქნებით, თუ მოლდოვა ამა თუ იმ სანქციებს შეუერთდება“, – აღნიშნავს ევროკავშირის ელჩი.