„თბილისი პრაიდის“ წინააღმდეგ მიმართული აქციის მონაწილეები დღეს ევროკავშირის ოფისთანაც იმყოფებოდნენ.
მათ ერთგვარი პერფორმანსი გამართეს და ადგილზე ევროკავშირის დროშა დაწვეს. აღნიშნულის შემდეგ აქციის მონაწილეებმა კვლავ პარლამენტის შენობასთან გადაინაცვლეს.
მანამდე „ალტ-ინფოს“ მხარდამჭერებმა აქცია ასევე „ქართული ოცნების“ ოფისთან გამართეს და საკუთარი მოთხოვნები გააჟღერეს. მათ პარტიის ოფისის შენობაზე ცისარტყელას ფერის სტიკერების გაკვრა სურდათ, რისი საშუალებაც მათ იქ მობილიზებულმა პოლიციამ არ მისცა.
დღეს „თბილისი პრაიდის“ მოწინააღმდეგეთა აქცია პარლამენტთან, 13:00 საათისთვის დაიწყო. პროტესტის მიმდინარეობისას ადგილზე ინციდენტიც მოხდა, აქციის ერთ-ერთმა მონაწილემ თავის დაწვა სცადა. აქციის მონაწილეებმა ასევე ლგბტ თემის დროშაც დახიეს.