კობახიძე აცხადებს, რომ ივანიშვილი არაა ოლიგარქი, ეს არის პირდაპირი განაცხადი, რომ მმართველ გუნდს არანაირი დღის წესრიგი არ აქვს ჩვენი ქვეყნისთვის, – ამის შესახებ ფრაქცია „ლელოს“ წევრმა, სალომე სამადაშვილმა განაცხადა.
„როდესაც ევროკავშირმა ძალიან ნათლად განაცხადა, რომ მთავარი დაბრკოლება საქართველოსთვის ევროკავშირში ინტეგრაციის გზაზე არის ბიძინა ივანიშვილის ოლიგარქიული მმართველობა, როდესაც კობახიძე აცხადებს, რომ ივანიშვილი არაა ოლიგარქი, ეს არის პირდაპირი განაცხადი, რომ მმართველ გუნდს არანაირი დღის წესრიგი არ აქვს ჩვენი ქვეყნისთვის. შესაბამისად, ეს თავისთავად აზრს უკარგავს ყველაფერს სხვას, რასაც კობახიძე ამბობს, თითქოს აქვს რაღაც მზადყოფნა იმისთვის, რომ საქართველომ ევროკავშირის წევრობის კანდიდატის სტატუსი მიიღოს“, – განაცხადა სამადაშვილმა.
ირაკლი კობახიძემ საზოგადოებას ის გეგმა გააცნო, რომლის მიხედვითაც მმართველი გუნდი ევროკავშირის წევრობის კანდიდატის სტატუსის მისაღებად საჭირო 12 რეკომენდაციის შესრულებას აპირებს.