იმ ქვეყნების უსაფრთხოება, რომლებიც ალიანსის წევრობისკენ ისწრაფვიან, გადაჯაჭვულია ჩვენს უსაფრთხოებასთან, – ნათქვამია ნატოს სტრატეგიულ კონცეფციაში, რომელიც ალიანსის წევრი ქვეყნების ლიდერებმა მადრიდის სამიტზე დაამტკიცეს.
„ჩვენ მტკიცედ ვუჭერთ მხარს მათ დამოუკიდებლობას, სუვერენიტეტსა და ტერიტორიულ მთლიანობას. ჩვენ გავაძლიერებთ პოლიტიკურ დიალოგსა და თანამშრომლობას მათთან, ვინც მიზნად ისახავს ალიანსში გაწევრიანებას, დავეხმარებით მათ მედეგობის გაძლიერებაში, გავაძლიერებთ მათ შესაძლებლობებსა და ჩვენს პრაქტიკულ მხარდაჭერას მათი ევროატლანტიკური მისწრაფებების მიმართ. ჩვენ გავაგრძელებთ ჩვენი პარტნიორობის განვითარებას ბოსნია და ჰერცეგოვინასთან, საქართველოსა და უკრაინასთან, რათა გავაძლიეროთ ჩვენი საერთო ინტერესი ევროატლანტიკური მშვიდობის, სტაბილურობისა და უსაფრთხოების მიმართ. ჩვენ ვადასტურებთ 2008 წლის ბუქარესტის სამიტზე მიღებულ გადაწყვეტილებასა და ყველა შემდგომ გადაწყვეტილებას საქართველოსა და უკრაინასთან დაკავშირებით“, – აღნიშნულია დოკუმენტში.