ევროკავშირი ნიშნავს ერთად ცხოვრებას და ამისთვის, თუ ერთ სამეზობლოში ერთი ქცევის წესია „მოსული“ და მეორე სამეზობლოში მეორე, ეს ერთმანეთთან ვერ დაახლოვდება,- ამის შესახებ პარტია „გირჩის“ წევრმა ჰერმან საბომ განაცხადა.
მისივე თქმით, ევროკავშირის კანდიდატის სტატუსის მისაღებად ქვეყანაში არა ტექნიკური, არამედ პოლიტიკური ცვლილებებია საჭირო.
„ყველა ის წინსვლა, რომელსაც აქამდე მიაღწია საქართველომ, იყო ბიუროკრატიული. ევროკავშირში დაინახეს, რომ ქვეყანა ავტორიტარიზმისკენ არ მიდის, ირანი არ არის, ადამიანები წესიერად იქცევიან, ნაკლები პრობლემაა, როდესაც ევროპაში ჩადიან, ნელ-ნელა როგორც ჩვენ ვდგამდით ნაბიჯებს ევროპისკენ, ისე მათ გადმოდგეს ჩვენკენ. მაგრამ, საბოლოო ჯამში ევროკავშირი ნიშნავს ერთად ცხოვრებას და ამისთვის, თუ ერთ სამეზობლოში ერთი ქცევის წესია „მოსული“ და მეორე სამეზობლოში მეორე, ეს ერთმანეთთან ვერ დაახლოვდება. იმ ბოლო ნაბიჯის გადადგმას სჭირდება სწორედ პოლიტიკური ცვლილებები ქვეყანაში და არა ტექნიკური“,- განაცხადა ჰერმან საბომ.
ევროპულმა საბჭომ უკრაინასა და მოლდოვას ევროკავშირის წევრობის კანდიდატის სტატუსი მიანიჭა, საქართველოს კი მიენიჭა ევროპული პერსპექტივა, წევრობის კანდიდატობას კი დასახული პირობების შესრულების შემდეგ მიიღებს.