„ხალხის ძალის“ წევრი ზურაბ ქადაგიძე ფინეთის საგარეო საქმეთა მინისტრთან საქართველოს პრემიერ-მინისტრის შეხვედრის გაუქმებას სოციალურ ქსელში ეხმიანება და ირაკლი კობახიძის ნაბიჯს ღირსეულს უწოდებს.
როგორც ქადაგიძე წერს, ფინეთის საგარეო საქმეთა მინისტრი რადიკალების მიტინგზე მისვლით აშკარად და ღიად ჩაერია საქართველოს შიდა საქმეებში, რაზეც რეაქცია იქნება მკაცრი.
„ფინეთის საგარეო საქმეთა მინისტრმა გადაკვეთა ყველა ზღვარი. ის, რაც მან ჩაიდინა, დიპლომატიასთან საერთო არაფერი აქვს. სუვერენული სახელმწიფოს შიდა საქმეებში ჩარევა, კანონსაწინააღმდეგო მიტინგში მონაწილეობა და ცრუ ბრალდებების გავრცელება არის არა უტაქტობა, არამედ უტიფრობა, რომელიც პირდაპირ შეურაცხყოფს საქართველოს.
საქართველოს პრემიერ-მინისტრი ძალიან სწორად მოიქცა, როცა ასეთ თავხედ პერსონასთან შეხვედრა გააუქმა, რადგან ღირსების საკითხი ყველაფერზე მაღლა დგას.
ასეთმა თავხედმა მინისტრმა და ყველა ევრო-ბიუროკრატმა უნდა გაიგოს მკაფიოდ: საქართველო არც მისი კოლონია, არც ექსპერიმენტის ველია და ვინც ჩვენს სუვერენიტეტს შეეხება, მიიღებს მკაცრ, ცივ და დაუნდობელ პასუხს.
დრო მოვიდა, ყველამ გაითავისოს – ქართველები თავიანთ ქვეყანას ვიღაცების გეოპოლიტიკურ მადას არ გადააყოლებენ და არც სხვის „შოუ-ბალეტში” შეასრულებენ რეკვიზიტის როლს,“ – წერს ზურაბ ქადაგიძე.