„ქართული ოცნების“ ქვემო სამგორის მაჟორიტარობის კანდიდატი ზაქარია წიკლაური საფერავის ქუჩის მოსახლეობას შეხვდა, თავისი სამოქმედო გეგმის პრიორიტეტები გააცნო და ადგილობრივებისგან მათი საჭიროებების შესახებ მოისმინა. როგორც შეხვედრაზე ითქვა, ადგილზე ბევრი რამ გაკეთდა – სრულად შეიცვალა მიწისქვეშა კომუნიკაციები, დაიგო გზის საფარი, გაკეთდა სტადიონი, თუმცა ცხადია, პრობლემებიც არის.
კერძოდ, მოსახლეობამ ითხოვა სტადიონის რეაბილიტაცია, ასევე, დაუსახლებელ ტერიტორიაზე, ალექსანდროვის ქუჩაზე რეკრეაციული სივრცის მოწყობა და ადგილობრივების საკუთრებაში არსებული კერძო სახლების დაკანონება, ვისაც ჯერ არ აქვს დაკანონებული. შეხვედრას საქართველოს პარლამენტის ვიცე-სპიკერი სოზარ სუბარი და პარლამენტის სამგორის რაიონის დელეგატი და სამგორის საარჩევნო შტაბის ხელმძღვანელი ვარლამ ლიპარტელიანი ესწრებოდნენ.