რუმინეთის პრეზიდენტმა, კლაუს იოჰანისმა კიევში უკრაინის, გერმანიის, საფრანგეთისა და იტალიის ლიდერებთან ერთად გამართულ პრესკონფერენციაზე განაცხადა, რომ რუმინეთი უკრაინის, მოლდოვისა და საქართველოსთვის ევროკავშირის წევრობის კანდიდატის სტატუსის მინიჭებას მხარს უჭერს.
„ჩვენ ვართ ევროპის ისტორიის გარდამტეხ მომენტში. განსაკუთრებული დრო მოითხოვს განსაკუთრებულ, სტრატეგიულ და შორსმჭვრეტელ პასუხებს. ევროკავშირის წევრობის კანდიდატის სტატუსის მინიჭება უკრაინის, მოლდოვისა და საქართველოსთვის აუცილებელია ჩვენი საერთო ღირებულებების ირგვლივ ძლიერი და გრძელვადიანი ფარის შესაქმნელად. ეს გადაწყვეტილება ბევრს მეტყველებს ჩვენს შესაძლებლობებზე უზრუნველვყოთ უსაფრთხოება და სტაბილურობა ჩვენს სამეზობლოში“, – აღნიშნა რუმინეთის პრეზიდენტმა.