თბილისის საკრებულოს რიგგარეშე სხდომაზე დედაქალაქის საკრებულოს ახლად არჩეულმა თავმჯდომარე ზურაბ აბაშიძემ ნდობისთვისა და საკრებულოს თავმჯდომარის პოსტზე არჩევისთვის კოლეგებს მადლობა გადაუხადა.
„მინდა მადლობა გადავუხადო „ქართული ოცნების“ პოლიტიკურ ხელმძღვანელობას, პარტიის საპატიო თავმჯდომარეს, ბატონ ბიძინა ივანიშვილს, პრემიერ-მინისტრ ირაკლი კობახიძეს, დედაქალაქის მერ კახა კალაძეს, გიორგი ტყემალაძეს და საკრებულოს წევრებს გამოცხადებული ნდობისთვის.
ეს ძალიან საპასუხისმგებლო თანამდებობაა და ჩვენ აქტიურად გავაგრძელებთ საქმიანობას ჩვენი დედაქალაქის, მისი თითოეული მოქალაქის საკეთილდღეოდ. ყველა გამოწვევას ერთობლივი ძალისხმევით გადავჭრით.
ვხედავთ რამდენი რამე გაკეთდა უკანასკნელი წლებში თბილისის განვითარებისთვის. ყველა მნიშვნელოვანი საქმე უკავშირდება თბილისის მერ კახა კალაძეს და საკრებულოს თავმჯდომარე გიორგი ტყემალაძეს. ჩვენ აუცილებლად გავაგრძელებთ ამ ინიციატივებს და დარწმუნებული ვარ, კიდევ ბევრ სასიკეთო პროექტს განვახორციელებთ.
ყველას კიდევ ერთხელ დიდ მადლობას მოგახსენებთ. მჯერა, ჩვენი თანამშრომლობა მომავალში კიდევ უფრო განმტკიცდება“, – განაცხადა ზურაბ აბაშიძემ.
თბილისის საკრებულოს ახლად არჩეულმა თავმჯდომარემ, ზურაბ აბაშიძემ, გიორგი ტყემალაძეს, რომელიც საკრებულომ დედაქალაქის ვიცე-მერის თანამდებობაზე დაამტკიცა, მომავალ საქმიანობაში წარმატება უსურვა.
„გიორგი ტყემალაძე ახლა უკვე თბილისის მუნიციპალიტეტის მერიიდან გააგრძელებს საქმიანობას და ჩვენს ქალაქსა და თანამოქალაქეებზე ზრუნვას. მსურს, წარმატებები ვუსურვო მას მომავალ საქმიანობაში“, – განაცხადა ზურაბ აბაშიძემ.