ევროპარლამენტარის, მარინა კალიურანდის განცხადებით, სამი ქვეყნისთვის კანდიდატის სტატუსის მინიჭებას ევროკავშირი განიხილავს რუსეთის მიერ უკრაინის წინააღმდეგ დაწყებული ომის გამო და ომი რომ არ ყოფილიყო, სამი ქვეყნის კანდიდატობაზე და კანდიდატობის მიზანშეწონილობაზე დღეს მსჯელობა არ იქნებოდა.
„კომპლექსური დისკუსიები მიმდინარეობს. თავიდანვე მინდა აღვნიშნო, რომ სამი ქვეყნისთვის კანდიდატის სტატუსის მინიჭებას განვიხილავთ რუსეთის მიერ უკრაინის წინააღმდეგ დაწყებული ომის გამო. ომი რომ არ ყოფილიყო, სამი ქვეყნის კანდიდატობაზე და კანდიდატობის მიზანშეწონილობაზე არ ვიმსჯელებდით. ომის გარეშე ტრიოდან არცერთი ქვეყანა კანდიდატის სტატუსისთვის მზად არ იქნებოდა. ეს არის ფაქტი და ეს არის რეალობა. უკრაინამ გახსნა სამივე ასოცირებული სახელმწიფოსთვის შესაძლებლობების ფანჯარა, მაგრამ როდესაც ფანჯარა გაიღება, მაშინ არის პოლიტიკური განცხადებებიც, პოლიტიკური გადაწყვეტილებაც და მოთხოვნებიც, რომლებიც ყველასთვის საერთოა. ამ მოთხოვნების დაკმაყოფილება ყველას ვალდებულებაა, ვისაც გაწევრიანება სურს. უკრაინას დღეს სჭირდება პოლიტიკური მხარდაჭერა უმაღლეს დონეზე. ევროპა გადაღლილია ომით, ჩვენ ყველაფერი უნდა გავაკეთოთ უკრაინისთვის საჭირო იარაღის გადასაცემად და ამ დროს, მინიმუმი რაც უნდა გავაკეთოთ, ეს არის უკრაინისთვის კანდიდატის სტატუსის მინიჭება“, – აცხადებს მარინა კალიურანდი.