იმედი მაქვს, რომ ძალიან მალე საქართველოსთან მიმართებაში ევროკავშირის გადაწყვეტილება იქნება მოწოდების სიმაღლეზე, რა ღირებულებებითაც თავის დროზე ევროკავშირი მისმა ფუძემდებლებმა დააფუძნეს, – ამის შესახებ ვიცე-პრემიერმა, კულტურის, სპორტისა და ახალგაზრდობის მინისტრმა, თეა წულუკიანმა ჟურნალისტებს განუცხადა.
მან კომენტარი საქართველოსთვის კანდიდატის სტატუსის მინიჭების საკითხზე გააკეთა.
„რა თქმა უნდა, ჩვენ გვაქვს მოლოდინი, რომ გადაწყვეტილება იქნება დადებითი, ვინაიდან ევროკავშირს მართავენ გონიერი ადამიანები. ეს ის ადამიანები არიან, ვინც აგრძელებს ფუძემდებლური მამების საქმეს. ეს არის ძალიან დიდი პასუხისმგებლობა და რასაკვირველია, იმედი მაქვს, რომ ძალიან მალე საქართველოსთან მიმართებაში ევროკავშირის გადაწყვეტილება იქნება მოწოდების სიმაღლეზე, რა ღირებულებებითაც თავის დროზე ევროკავშირი მისმა ფუძემდებლებმა დააფუძნეს“, – განაცხადა წულუკიანმა.