ჩემი აზრით, „ნაციონალურ მოძრაობას“ აღარ აქვს იმის რესურსი, რომ რაიმე ტიპის მღელვარება გამოიწვიოს ამ ქვეყანაში. ბოლო მოვლენებმა აჩვენა, რომ მას, როგორც პარტიას, მიუხედავად იმისა, რომ აქვს მნიშვნელოვანი მხარდაჭერა, ამ მხარდაჭერის ქუჩაში კონვერტაციის და ქუჩაში მღელვარების მოწყობის რესურსი არ აქვს, რაც საბოლოო ჯამში, მშვიდობის უზრუნველყოფის თვალსაზრისით ძალიან მნიშვნელოვანია, – ამის შესახებ „ქრონიკასთან“ პარტია „მოქალაქეების“ ერთ-ერთმა ლიდერმა, ლევან იოსელიანმა განაცხადა.
„მეორეს მხრივ, მას აქვს ჯერ კიდევ რესურსი, რომ ისევ შეასრულოს ის როლი, რასაც ასრულებს და რასაც ძალიან კარგად იყენებს „ქართული ოცნება“. ესაა იმ ბუას როლი, რომლის აფრიალებითაც „ოცნება“ ახერხებს, რომ მოახდინოს თავისი მხარდამჭერების მობილიზება. ეს თუ სადღაც არ დამთავრდა, ჩვენ ვიქნებით გაჭედილი გაუგებარ დაპირისპირებაში, სადაც ჩემდა სამწუხაროდ, მერე აღარ არის ადგილი განსხვავებული მოსაზრებების, განსხვავებული პარტიების. ამიტომაც არის, რომ საბოლოოდ ვხედავთ, რომ მხარდაჭერა ამ ორი პარტიის გარდა სხვა პოლიტიკური ჯგუფების მიმართ არის ძალიან დაბალი დაბალი, რაც გამოწვეულია ამ მაღალი პოლარიზაციის და დაპირისპირების ხარისხით რაც ჩვენს ქვეყანაში არსებობს და რომლის შემცირების ერთადერთ სწორ გზად მე მესახება კონსტიტუციური რეფორმის გატარება, რომელიც გულისხმობს, იმ პირველი მოსმენით მიღებული ვერსიის საბოლოოდ დამტკიცებას, სადაც ბარიერი 2%-მდე უნდა დაიწიოს“, – აღნიშნა იოსელიანმა.