რუსთავში გმირთა ხეივნის რეაბილიტაციის ფარგლებში, სკვერის ცენტრალურ ნაწილში განთავსებულ მემორიალს რეკონსტრუქცია ჩაუტარდება.
რუსთავის მერიის ინფორმაციით, ქალაქის მთავარი არქიტექტორის კობა ძლიერიშვილის განცხადებით, პროექტის ფარგლებში, საქართველოს ტერიტორიული მთლიანობისათვის დაღუპულ გმირთა მემორიალის რეკონსტრუქცია განახლებული კონცეფციით მოხდება.
„გმირთა ხეივნის რეაბილიტაციის პროექტი მასშტაბურ სამუშაოებს მოიცავს. სკვერში სხვადასხვა პერიოდის ქართველ გმირთა მემორიალებია განთავსებული, რომელთა შორის ერთ-ერთი ცენტრალურ ნაწილში მდებარეობს. აღნიშნული მემორიალი, წლების წინ ჩემი მუშაობის პერიოდში შეიქმნა, მოხარული ვარ, რომ დღეს ისევ ჩართული ვარ ჩემი ნამუშევრის განახლებაში. მონუმენტი ცამეტი აზიდული სვეტისაგან შედგება, რიცხვი 13 სიმბოლურად – ,,ცაზე მეტს“ გულისხმობს. ახალი კონცეფციით სვეტებს მანათობელი სხივები გააგრძელებს. ქალაქში მემორიალების რეაბილიტაციით ვცდილობთ სათანადოდ დავაფასოთ და პატივი მივაგოთ ქართველ გმირებს“, – განაცხადა რუსთავის მთავარმა არქიტექტორმა, კობა ძლიერიშვილმა.
მერიის ინფორმაციით, ეტაპობრივად, რეაბილიტაცია რუსთავში არსებულ ყველა მემორიალს ჩაუტარდება.