პრემიერ-მინისტრმა ირაკლი ღარიბაშვილმა ჟოზეფ ბორელთან შეხვედრის შემდეგ გამართულ ერთობლივ პრესკონფერენციაზე ევროკავშირის 12 რეკომენდაციის შესრულების პროცესზე ისაუბრა.
როგორც პრემიერმა განაცხადა, რეკომენდაციების ძირითადი ნაწილი შესრულებულია.
„დარჩენილია რამდენიმე რეკომენდაცია, რომელზეც ჩვენ აქტიურად ვმუშაობთ. ერთ-ერთი არის დეოლიგარქიზაცია. ჩვენ გავითვალისწინეთ ევროკომისიის რეკომენდაციები, არ მივიღეთ კანონი. ამის ნაცვლად ჩვენ ერთ-ორ კვირაში მივიღებთ სამოქმედო გეგმას, რომელიც სრულად ასახავს ამ რეკომენდაციის სულისკვეთებას. რაც შეეხება კიდევ ერთ რეკომენდაციას, რომელიც სასამართლო რეფორმას ეხება – მინდა გითხრათ, რომ ჩვენ ძალიან ბევრი რეფორმა განვახორციელეთ სასამართლო სისტემაში, რომ უფრო ინკლუზიური, გამჭვირვალე და ანგარიშვალდებული გამხდარიყო. ბოლო 10 წლის განმავლობაში სასამართლომ განიცადა ტრანსფორმაცია და დღეს სასამართლო არის მართლაც სანიმუშო სისტემა. ნდობა სასამართლოს მიმართ საქართველოში არის ძალიან მაღალი და ზოგადად ევროპული სასამართლოების ნდობის თანაბარი მაჩვენებელი აქვს ჩვენს სასამართლოს. ამას გარდა, ჩვენ ვენეციის კომისიიდან საბოლო რეკომენდაციებს ველოდებით, რის შემდეგაც მოხდება საბოლოო ცვლილებების განხორციელება. რჩება კიდევ ერთი რეკომენდაცია – დეპოლარიზაცია შეუსრულებელი. კარგად გვესმის, რომ ნებისმიერი დემოკრატიისთვის დამახასიათებელია განსხვავებული აზრი, ჩვენ ამას დიდ პატივს ვცემთ. ჩვენთან არსებობს მრავალპარტიული პარლამენტი, 9 პარტია შევიდა პარლამენტში 2020 წელს. გვაქვს თავისუფალი მედია, ძალიან ძლიერი ოპოზიციური მედიასაშუალებები და ჩვენ რა თქმა უნდა ვაკეთებთ ყველაფერს, რომ პოლარიზაცია შემცირდეს, მაგრამ რა თქმა უნდა მხოლოდ ჩვენს სურვილზე არ არის დამოკიდებული ამ საკითხის დარეგულირება“, – განაცხადა პრემიერმა.