საქართველოს ნატოსთან თავსებადობა ეჭვგარეშეა. ველოდებით ნატოს პოლიტიკურ გადაწყვეტილებას, – ამის შესახებ საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ ურუგვაულ გამოცემასთან ინტერვიუში განაცხადა.
„გვესმის, რომ ომის დასრულებამდე ნატოში გაწევრიანება არ მოხდება. გულწრფელად რომ ვთქვა, ვილნიუსის სამიტზე რაიმე წინსვლას არ ველოდით. არ ვიტყოდი, რომ სამიტის შემდეგ უფრო შორს ვართ-მეთქი, მაგრამ არც უფრო ახლოს ვართ. ასეც კი, ხაზგასმით უნდა ითქვას, ნატოში ინტეგრაციის კუთხით, საქართველო მოწინავე ქვეყანაა. გვაქვს ყველა ინსტრუმენტი გაწევრიანებისათვის. ჩვენი შეიარაღებული ძალების 85%-ზე მეტი მსახურობდა ნატოს სხვადასხვა მისიაში ავღანეთში, ერაყში თუ სხვაგან. საქართველოს ნატოსთან თავსებადობა ეჭვგარეშეა. ველოდებით ნატოს პოლიტიკურ გადაწყვეტილებას. უკან თუ მივიხედავთ, საქართველო და უკრაინა ადრე რომ მიეღოთ ნატოში, ამ ორი ქვეყნიდან არცერთში ომი არ იქნებოდა. მაგრამ ახლა, კონფლიქტების გამო, პრაქტიკულად არ ვართ წევრები. ჩვენ ორლესულ ხმალზე ვართ: ერთი მხრივ, გვინდა წევრობა, მეორე მხრივ, რუსეთი ცდილობს ამისათვის ხელის შეშლას“, – აცხადებს სამხარაძე.