IMG.GE ___________________________________ IMG.GE

ახალი შემთხვევები ძირითადად დაკავშირებულია „ავერსის“ კლინიკასთან და კლინიკის ქსელის ყველა თანამშრომელი იტარებს ტესტირებას. ჯანდაცვის მინისტრის ინფორმაციით, კლინიკას მიეცა რეკომენდაციები და ეს საკითხი მინისტრის და პრემიერის პირადი კონტროლის ქვეშაა. ამის შესახებ ეკატერინე ტიკარაძემ მთავრობის სხდომის შემდეგ განაცხადა.

გარდა ამისა, მინისტრის ინფორმაციით, სასტუმრო „ოაზისში“ გუშინ რვაასზე მეტი ტესტი ჩატარდა.

ეკატერინე ტიკარაძის თქმით, პასუხები დღის მეორე ნახევარში გაირკვევა, რის საფუძველზეც მიიღება გადაწყვეტილებები, თუ როგორი იქნება სტრატეგია ადგილზე მყოფი დამსვენებლების მიმართ.

„ასევე მნიშვნელოვანია, რომ „დონას“ კლასტერში 600-ზე მეტი ტესტი ავიღეთ. გამოვლენილია მხოლოდ ერთი შემთხვევა, რაც არის კეთილსაიმედო მაჩვენებელი და იმის ვარაუდის საფუძველია, რომ ამ კლასტერის ლიკვიდირება მოხდა“, – აღნიშნა მინისტრმა.

მისი თქმით, შრომის უსაფრთხოების სამსახურმა 7 ობიექტი შეამოწმა, რომელთაგან 2 არ ფუნქციონირებდა, 4 ვერ აკმაყოფილებდა ნორმებს და მათ ამის შესახებ სიტყვიერი გაფრთხილებაც ჰქონდათ.

„ასევე მიღებულია გადაწყვეტილება გარკვეული საჯარიმო სანქციების შესახებ“, – განაცხადა ეკატერინე ტიკარაძემ.

საქართველოში დღეს კორონავირუსის 20 ახალი შემთხვევა გამოვლინდა, გუშინ ეს რიცხვი 38-ს შეადგენდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

კომენტარის დატოვება
IMG.GE
გაზიარება