არ გამოვრიცხავ, რომ იქნება პროვოკაციები, მაგრამ ძლიერი და შემდგარი სახელმწიფო იმას ნიშნავს, რომ ამ პროვოკაციებს საკადრისი პასუხი გაეცეს, – ამის შესახებ მამუკა მდინარაძემ გადაცემაში „არჩევნები 2021“ განაცხადა.
„საკადრის პასუხში იმას კი არ ვგულისხმობ, რასაც ისინი 2012 წელს კადრულობდნენ. დემოკრატიულ პირობებში, ადამიანის უფლებების დაცვის პირობებში გავცემთ საკადრის პასუხს. აპრიორში ცდებიან ისინი, ვინც ამ თეზებს ეწინააღმდეგებიან. დემოკრატია და სახელმწიფოს სიძლიერე მათ ვერ წარმოუდგენიათ თავსებად რეალობად. კარგია, როცა სახელმწიფო თავის სიმაღლეზე დგას და შეუძლია განუხრელად დაცვას დემოკრატიული პრინციპები. და ხვალ, კიდევ ერთხელ 2012 წლის შემდეგ ქართველი ხალხი იტყვის თავის სიტყვას სიმართლესა და სიცრუეს შორის, სიკეთესა და ბოროტებას შორის. გაკეთებულ რეალურ საქმეებს და იმას შორის, რასაც ისინი ფასადურად აჩვენებდნენ ჩვენს მოქალაქეებს. ამიტომ ხვალ კიდევ ერთხელ ვიზეიმებთ გამარჯვებას, ამ პროვოკაციების არავის ეშინია“, – აღნიშნა მდინარაძემ.
