აშშ-ის სახელმწიფო მდივანმა, ენტონი ბლინკენმა უარყო უკრაინის პრეზიდენტის, ვოლოდიმირ ზელენსკის მოთხოვნა უკრაინის ნატოში დაჩქარებული წესით გაწევრიანების თაობაზე. ინფორმაციას ამის შესახებ ამერიკული გაზეთი The Wall Street Journal-ი ავრცელებს.
ენტონი ბლინკენმა ჟურნალისტებს განუცხადა, რომ აშშ-სა და მის მოკავშირეებს აქვთ გეგმა, დაეხმარონ უკრაინას თავდაცვაში, თუმცა ნატოში გაწევრიანების საკითხთან დაკავშირებით, მან მხარი დაუჭირა ალიანსის ტრადიციულ პროცესს.
„მე შემიძლია მხოლოდ გავიმეორო ის, რომ ნატოს კარი ღია დარჩება, მათ შორის უკრაინისთვის. პროცესი იმ ქვეყნებისთვის, რომლებიც ცდილობენ ალიანსში გაწევრიანებას, ცნობილია. უკრაინა, ისევე როგორც სხვა ქვეყნები, აგრძელებს ამ პროცესის შესრულებას“, – აღნიშნა აშშ-ის სახელმწიფო მდივანმა.
მანამდე ვოლოდიმირ ზელენსკიმ განაცხადა, რომ უკრაინას ნატოში დაჩქარებული წესით გაწევრიანებაზე განაცხადი შეაქვს.