ევროპული საბჭოს პრეზიდენტმა, შარლ მიშელმა განაცხადა, რომ ევროკავშირი ღია უნდა იყოს მათთვის, ვისაც არ სურს კრემლის ინსტრუმენტი იყოს.
„პრინციპში, ვფიქრობ, რომ ევროკავშირმა უნდა უმასპინძლოს მათ, ვინც საფრთხეშია პოლიტიკური შეხედულებების გამო. თუ რუსეთში ხალხს საფრთხე ემუქრება მათი პოლიტიკური შეხედულებების გამო, რადგან ისინი არ მიჰყვებიან კრემლის ამ გიჟურ გადაწყვეტილებას უკრაინაში ომის დაწყებასთან დაკავშირებით, ეს უნდა გავითვალისწინოთ. ვეთანხმები იმ აზრს, რომ ჩვენ ძალიან სწრაფად უნდა ვითანამშრომლოთ და კოორდინაცია გავუწიოთ ამ საკითხს, რადგან ეს არის ახალი ფაქტი – ნაწილობრივი მობილიზაცია“, – აღნიშნა ევროპული საბჭოს პრეზიდენტმა.
შარლ მიშელის თქმით, ის მზად არის, ამ საკითხზე ევროკავშირის წევრი ქვეყნების მეთაურებთან კონსულტაციები გამართოს.
აღსანიშნავია, რომ ევროკავშირის წევრი სახელმწიფოების ელჩები რუსეთიდან გაქცეული მოქალაქეებისთვის კარის გახსნის საკითხს ორშაბათს განიხილავენ.