მამუკა მდინარაძე ენერგეტიკისა და სუფთა ჰაერის კვლევის საერთაშორისო ცენტრის მონაცემებს გამოეხმაურა, რომელთა მიხედვითაც უკრაინაში ომის დაწყებიდან რუსეთმა ევროკავშირისგან ენერგომატარებლების სანაცვლოდ საკმაოდ დიდი თანხა მიიღო.
„იმ ფონზე, რაც ხდება დღევანდელ მსოფლიოში, რაც ხდება დღეს რეგიონში, როგორ ესხმის უკრაინას და უკრაინელ ხალხს რუსეთი – ამ ფონზეც კი ვერ ხერხდება ევროპული ქვეყნების ენერგოდამოკიდებულება, სამწუხაროდ. და ამ ფონზე, როდესაც საქართველოს ამუნათებენ – ჩვენი ოპონენტები, მათი პატრონები, დავალებების მიმცემები, ლობისტები იმასთან დაკავშირებით, რომ საქართველომ უნდა გააკეთოს ის, რასაც, სამწუხაროდ, მასზე ათჯერ ძლიერი ქვეყნები ვერ ახერხებენ, საქართველოს თითოეული მოქალაქისთვის მარტივი გასაშიფრია რისკენ არის ეს მიმართული“, – განაცხადა მდინარაძემ.
უკრაინაში ომის დაწყებიდან 6 თვეში – რუსეთმა წიაღისეული საწვავის ექსპორტიდან 158 მილიარდი ევროს შემოსავალი მიიღო, ევროკავშირის წილი 54%-ია, რაც თანხობრივად 85 მილიარდ ევროს აჭარბებს. რუსული ენერგომატარებლების ყველაზე დიდი იმპორტიორები ევროკავშირი, ჩინეთი, თურქეთი და ინდოეთი იყვნენ. მონაცემები, ენერგეტიკისა და სუფთა ჰაერის კვლევის საერთაშორისო ცენტრმა (CREA) გამოაქვეყნა.