ჩვენ გადავწყვიტეთ არასამთავრობო ორგანიზაციებთან ერთად გვემუშავა და შემოდგომის დასაწყისში პლენარულ სხდომებზე, მაგიდაზე მზა პროდუქტი დაგვედო, – ამის შესახებ ევროკომისიის 12 რეკომენდაციის შესრულებასთან დაკავშირებით „ნაციონალური მოძრაობის“ წევრმა, ბაჩო დოლიძემ „ქრონიკას“ განუცხადა.
„ამ სიტუაციაში, როდესაც უკვე ყველა კანონპროექტი მზად გვაქვს, „ქართულ ოცნებას“ მოუწევს უკვე საკუთარი პოზიციის დაფიქსირება, ან იმის თქმა, რომ არ ვარგა თქვენი საკანონმდებლო ცვლილებები და მე მაქვს ალტერნატივა. თუ მათი ალტერნატივა სრულად პასუხობს 12-პუნქტიან რეკომენდაციას, ჩვენ ვთქვით კიდევაც, რომ რა თქმა უნდა, მხარს დავუჭერთ და არ ვიქნებით ჩასაფრებულ პოზიციაში, რომ გინდა თუ არა მოდი, ჩემი ვარიანტი გაიტანე“, – განაცხადა დოლიძემ.
ევროკომისიის 12 რეკომენდაციის შესასრულებლად პარლამენტში შექმნილი სამუშაო ჯგუფები თვეზე მეტია შეხვედრებს მართავენ, ქართულ მხარეს 1 ნოემბრამდე აქვს ვადა იმისთვის, რომ საკანონმდებლო ინიციატივები კანონებად აქციოს. 12 პრიორიტეტის შესრულების პროცესში მთავარი პრობლემა კვლავ პარალელური ფორმატებია.