ტელემაუწყებლობის მთელი ქვეყნის მასშტაბით გამავრცელებელი კომპანიის მიმართ არსებული დავალიანების არდაფარვის შემთხვევაში, ტელევიზიები “რუსთავი2”, ტვ პირველი და “ობიექტივი” გამოირთვება ქსელიდან. ამის შესახებ განცხადებას კომპანია “სტერეო პლუსი” ავრცელებს.
“მიუხედავად რიგი მაუწყებლების მიერ ფინანსური ვალდებულების შეუსრულებლობისა, ამ დრომდე, ჩვენს კონტრაქტორებს ვემსახურებოდით უწყვეტად, თუმცა იძულებულნი ვართ, საკმაოდ დიდი ფინანსური დავალიანების გამო, შევწყვიტოთ მომსახურება შემდეგ არხებთან: რბჯ (1 გასართობი), მედია ჰოლდინგი (რუსთავი 2, მარაო, კომედი არხი), TV პირველი და ობიექტივი. აღნიშნულ არხებს, გარდა იმისა, რომ დიდი ოდენობით დავალიანება გააჩნიათ, ბოლო 3 თვეა, ჩვენი არაერთი წერილობითი, ზეპირი და ელექტრონული გაფრთხილების მიუხედავად, რაიმე სახის ქმედებაც კი არ განუხორციელებიათ, დავალიანების აღმოსაფხვრელად.
იძულებული ვართ, გავაკეთოთ შემდეგი განცხადება, რომ თუ აღნიშნული არხები, 1 აგვისტომდე არ მოახდენენ შესაბამის ფინანსურ რეაგირებას, ხელშეკრულების თანახმად, შეუწყდებათ მომსახურება და შესაბამისად გაითიშებიან მულტიპლექსიდან.”– ნათქვამია განცხადებაში.