გიორგი გაბუნია: სად დაინახეს ამ ჩანაწერში თუნდაც იმის მტკიცებულება, რომ ჩვენ თურმე ვახდენთ მოვლენების ფაბრიკაციას და ვგეგმავთ ჩვენ მიერვე გამოგონილი ამბების გაშუქებას?

სად დაინახეს ამ ჩანაწერში თუნდაც იმის მტკიცებულება, რომ ჩვენ თურმე ვახდენთ მოვლენების ფაბრიკაციას და ვგეგმავთ ჩვენ მიერვე გამოგონილი ამბების გაშუქებას, – ამის შესახებ „მთავარის“ ჟურნალისტმა, გიორგი გაბუნიამ განაცხადა.

„წერილობით მესიჯებს რომ თან აჩვენებ ეკრანზე და თან ახმოვანებ, ეს მაგალითად გაყალბება ჰგონიათ? გაგების პრობლემასთანაც გვაქვს საქმე და პლუს ამას, შეგნებულებად იტყუებიან“, – აღნიშნა გიორგი გაბუნიამ.

გადაცემაში „უცნობის კიდობანი“ გადაიცა აუდიოჩანაწერი, რომლის მიხედვით, სავარაუდოდ „მთავარი არხის“ გადაცემა post-Factum-ის წამყვანი გიორგი გაბუნია და ამავე გადაცემის თანამშრომლები განიხილავდნენ სოსო გოგაშვილის მიერ, მათთვის მიწოდებულ მასალას, სათაურით – „საიდუმლო ფაილები პირდაპირ სუს-ის კომპიუტერებიდან“ – პირობითი მსჯავრდებულების გრძელი სია, რომლებსაც „ქართული ოცნება“ სასჯელისგან ათავისუფლებს და შემდეგ საკუთარი მიზნებისთვის იყენებს. ჩანაწერის თანახმად, სავარაუდოდ გიორგი გაბუნიამ გაიხსენა სოსო გოგაშვილთან შეხვედრა და ამ უკანასკნელის მიერ გიორგი თარგამაძისა და ნოდარ მელაძისთვის გადაცემული მასალები.