ვინსენტ ვან გოგის ნახატი „აყვავებული წაბლის ხეები“ Sotheby’s აუქციონზე 190,4 მილიონ დოლარად გაიყიდა, რაც მხატვრის ნამუშევრებისთვის რეკორდული მაჩვენებელია. მანამდე ვან გოგის ყველაზე ძვირადღირებული ნახატი იყო „პურის ყანა კვიპაროსით“ – 2022 წელს ტილო 117,2 მილიონ დოლარად გაიყიდა.Sotheby’s-ის ვაჭრობის ისტორიაში „აყვავებული წაბლის ხეები“ ღირებულებით მეორე ადგილზე გავიდა: რეკორდი გუსტავ კლიმტის „ელიზაბეტ ლედერერის პორტრეტს“ ეკუთვნის, რომელიც 2025 წელს 236,4 მილიონ დოლარად გაიყიდა. ვან გოგმა ნახატი 1890 წელს, პარიზის მახლობლად მდებარე სოფელ ოვერ-სიურ-უაზში დახატა, სადაც სიცოცხლის ბოლო ორი თვე გაატარა.
ტილო აუქციონზე კიდევ 11 ნახატთან ერთად გაიტანეს, როგორც არგენტინელი მეცენატების – კარლოს ბლაკიესა და მისი მეუღლის, ნელი არიეტას კოლექცია.ამასთან, არსებობდა ვაჭრობის ჩაშლის საფრთხე, რადგან ნახატის გამო ბლაკიე-არიეტასა და გერმანელი გამომცემლის, სამუელ ფიშერის მემკვიდრეებს შორის დავა მიმდინარეობდა. ამ უკანასკნელის შთამომავლები ამტკიცებდნენ, რომ მათმა ნათესავებმა ტილო 1936 წელს „ნაცისტების მხრიდან დევნის გამო“ გაყიდეს.1936 წლის შემდეგ, ბლაკიე-არიეტამდე, ნახატს კიდევ ხუთი მფლობელი ჰყავდა. ცოლ-ქმარმა ის მხოლოდ 1975 წელს შეიძინა. საბოლოოდ, აუქციონის სახლმა მემკვიდრეებს შორის დავის მოგვარება შეძლო.ვაჭრობის დაწყებამდე ექსპერტები ნახატს დაახლოებით 180 მილიონ დოლარად აფასებდნენ. აუქციონამდე ტილო გამოფენილი იყო ლონდონში, პარიზში, ტაიბეიში, ჰონგ-კონგსა და ნიუ-იორკში.
