საქართველო ევროპის უსაფრთხოების ძირითადი პრინციპების შესახებ დეკლარაციას შეუერთდა. დოკუმენტი დუბლინში 12 ნოემბერს მიიღეს ევროპული პოლიტიკური გაერთიანების სამიტზე, რომელსაც ხელი 40-მა ქვეყანამ მოაწერა. დეკლარაცია საფრანგეთის ინიციატივით შეთანხმდა.
დოკუმენტის ხელმოწერით საქართველო ადასტურებს სახელმწიფოების სუვერენიტეტის, ტერიტორიული მთლიანობისა და საერთაშორისოდ აღიარებული საზღვრების ხელშეუხებლობის პრინციპების მხარდაჭერას. დეკლარაცია აღიარებს სახელმწიფოების უფლებას, დამოუკიდებლად განსაზღვრონ საგარეო ურთიერთობები და თავად გადაწყვიტონ, რომელ საერთაშორისო ორგანიზაციასა თუ სამხედრო ალიანსში გაწევრიანდნენ.
ამასთან, დეკლარაციაში მნიშვნელოვანი ადგილი ეთმობა უკრაინის საკითხს. ხელმომწერი ქვეყნები ადასტურებენ უკრაინის დამოუკიდებლობის, სუვერენიტეტისა და ტერიტორიული მთლიანობის მხარდაჭერას. დოკუმენტში აღნიშნულია, რომ უკრაინაში მშვიდობის პირობები უკრაინის მონაწილეობით უნდა განისაზღვროს, ევროპის უსაფრთხოებასთან დაკავშირებული საკითხები კი ევროპული სახელმწიფოების მონაწილეობის გარეშე არ უნდა გადაწყდეს.
დოკუმენტი ითვალისწინებს თანამშრომლობის გაძლიერებას უცხოური საინფორმაციო ჩარევის, ტერორიზმის, ჰიბრიდული საფრთხეების, კიბერშეტევების, ნარკოტრეფიკინგისა და არალეგალური მიგრაციის წინააღმდეგაც.
დეკლარაციაში საუბარია ამერიკის შეერთებულ შტატებსა და კანადასთან ტრანსატლანტიკური თანამშრომლობის მნიშვნელობაზეც.
დოკუმენტის ხელმოწერით ქვეყნებს კოლექტიური თავდაცვის ავტომატური ვალდებულება არ ეკისრებათ. დეკლარაცია არსებული საერთაშორისო სამართლებრივი პრინციპებისა და ევროპული უსაფრთხოების მექანიზმების მხარდაჭერას ემსახურება.
საქართველოს დელეგაციას სამიტზე პრემიერ-მინისტრი ირაკლი კობახიძე ხელმძღვანელობდა.