საქართველოს რეგიონული განვითარებისა და ინფრასტრუქტურის მინისტრის მოადგილე ილია ბეგიაშვილი, გურიის მხარეში სახელმწიფო რწმუნებულ გიორგი ღურჯუმელიძესთან, საქართველოს პარლამენტში გურიის დელეგატ ვასილ ჩიგოგიძესთან და ადგილობრივი ხელისუფლების წარმომადგენლებთან ერთად, იმ კომპანიების წარმომადგენლებს შეხვდა, რომლებიც რეგიონში ინფრასტრუქტურულ პროექტებს ახორციელებენ.
შეხვედრაზე განიხილეს მუნიციპალიტეტებში მიმდინარე და დაგეგმილი პროექტები, სამუშაოების დროულად და ხარისხიანად შესრულების საკითხები და სამშენებლო სექტორში არსებული გამოწვევები.
ასევე, მინისტრის მოადგილემ, რწმუნებულმა და გურიის დელეგატმა, მიმდინარე ინფრასტრუქტურულ პროექტებზე მუნიციპალიტეტების ხელმძღვანელ პირებთან ერთად იმსჯელეს, მიმოიხილეს 2027 წლისთვის დაგეგმილი სამუშაოები და რეგიონში არსებული საჭიროებები.
2026 წელს, გურიის რეგიონში ინფრასტრუქტურული პროექტების განსახორციელებლად 41 მილიონ ლარზე მეტი ღირებულების 418 პროექტია დაფინანსებული.