ხელვაჩაურის მუნიციპალიტეტი „ვარდისფერი ოქტომბერის“ კამპანიას შეუერთდა.
ხელვაჩაურის კულტურის ცენტრში ძუძუს კიბოს შესახებ ცნობიერების ამაღლების საერთაშორისო თვის ფარგლებში საინფორმაციო შეხვედრა „ვარდისფერი ოქტომბერი“ გაიმართა.
შეხვედრის მიზანი ქალთა ჯანმრთელობის დაცვის ხელშეწყობა და ძუძუს კიბოს ადრეული გამოვლენისა და რეგულარული სკრინინგის მნიშვნელობის შესახებ საზოგადოების ინფორმირებულობის ამაღლება იყო.
შეხვედრაში მონაწილეობდნენ ბათუმის საკრებულოს ქალთა და ბავშვთა საკითხებზე მომუშავე კომისიის თავმჯდომარე, ნატალია ზოიძე, აჭარის საზოგადოებრივი ჯანდაცვის ცენტრის დირექტორი, რუსუდან შავიშვილი, აჭარის საზოგადოებრივი ჯანდაცვის ცენტრის ადმინისტრაციული მართვის სამსახურის უფროსი, ია ჩხაიძე და საუნივერსიტეტო კლინიკის კლინიკური მენეჯერი, თამარ მხატვარი.
თამარ მხატვარმა საზოგადოებას მიაწოდა ინფორმაცია ძუძუს კიბოს რისკ-ფაქტორების, საყურადღებო სიმპტომების, ადრეული დიაგნოსტიკისა და რეგულარული სკრინინგის მნიშვნელობის შესახებ.
კამპანია აჭარის საზოგადოებრივი ჯანდაცვის ცენტრის, ხელვაჩაურის მუნიციპალიტეტის მერიისა და საკრებულოს, ქალთა და ბავშვთა საკითხებზე მომუშავე მუნიციპალური საბჭოსა და მუნიციპალიტეტის ქალთა ოთახის ჩართულობით გაიმართა.