რაგბის კავშირის პრეზიდენტმა, სოსო ტყემალაძემ, „ბორჯღალოსნების“ მიერ იტალიის სარაგბო ნაკრების დამარცხების შესახებ ისაუბრა და აღნიშნა, რომ ეს წარმატება ერთიანობის შედეგია.
„ეს მხოლოდ მორაგბეების წარმატება არ არის, ესაა იმ ერთობის წარმატება, რომელსაც ქართული საზოგადოება ჰქვია – წარმატება არ იქნებოდა, ბატონ ბიძინას რომ ეს არ გაეკეთებინა, ან მაყურებელი არ მოსულიყო, ან ბიჭები შესაბამისად არ დახარჯულიყვნენ, ან [რაგბის] კავშირს ეს ყველაფერი ისე არ მოეწყო, როგორც მოწყობილი იყო…. ამ ყველაფრის ერთობამ მოიტანა წარმატება. ამიტომ, ეს გამარჯვება ერთიანია. ერთიანობა და გუნდურობა ოცნებებს ახდენს“, – განაცხადა სოსო ტყემალაძემ.
ბიძინა ივანიშვილის საქველმოქმედო ფონდმა „ქართუმ“ საქართველოში ათობით სარაგბო ინფრასტრუქტურული პროექტი განახორციელა, მათ შორის, ააშენა საწვრთნელი ცენტრები და სტადიონები, რისთვისაც ათობით მილიონი ლარი დაიხარჯა.
10 ივლისს, საქართველოს მორაგბეთა ნაკრებმა იტალია ანგარიშით 28:19 დაამარცხა. შეხვედრა ბათუმში, „აჭარაბეთ არენაზე“ გაიმართა.