თანმიმდევრობის ის სქემა, რომელიც იყო შეთავაზებული საარჩევნო ბარიერთან დაკავშირებით, ეს არავის მიმართ განცხადება ან, მით უმეტეს, ულტიმატუმი არ ყოფილა, – ამის შესახებ „ქრონიკის“ ეთერში პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.
„ჩვენ გავაცანით საზოგადოებას იმ ნაბიჯების თანმიმდევრობა, რომლებითაც ვაპირებთ სვლას ამ მიმართულებით. ულტიმატუმს დაემსგავსა ოპოზიციის მხრიდან გაკეთებული შეფასებები და შემდგომ დაკავებული პოზიცია, როდესაც ისინი ითხოვენ , რომ „ჯერ ეს გააკეთეთ და მხოლოდ ამ პირობით ვართ თანახმა, ვიყოთ კონსტრუქციულები დეპოლარიზაციის მიმართულებით“. დეპოლარიზაცია არის პროცესისთვის დამახასიათებელი ატრიბუტი და თვისება. ეს არის მიმდინარე დემოკრატიული პროცესის თვისობრივი მახასიათებელი“, – განაცხადა სარჯველაძემ.