„რესპუბლიკელი“ სენატორები: „ჰამასის“ მიერ ისრაელის წინააღმდეგ განხორციელებული თავდასხმების ფონზე, აშშ-მა ყველა საჭირო ნაბიჯი უნდა გადადგას ირანის პასუხისმგებლობის საკითხის დასაყენებლად

42 „რესპუბლიკელი“ სენატორი პრეზიდენტ ჯო ბაიდენს ახლო აღმოსავლეთის რეგიონში ამერიკის უახლოესი მოკავშირის, ისრაელის მხარდაჭერისკენ მოუწოდებს.

„პალესტინის ტერორისტული ორგანიზაციის „ჰამასის“ მიერ ისრაელის წინააღმდეგ განხორციელებული სარაკეტო თავდასხმების თაობაზე გწერთ. ბოლო დღეების განმავლობაში, ღაზაში პალესტინელმა ტერორისტებმა, რომლებსაც ირანი აფინანსებს, ისრაელის მიმართულებით სარაკეტო თავდასხმა განახორციელოს. მათი სამიზნე ისრაელის მშვიდობიანი მოსახლეობა და ქალაქებია, მათ შორის ისრაელის დედაქალაქი, იერუსალიმი. ეს შეშფოთებას იწვევს, რადგან ამჟამად თქვენი ადმინისტრაციის წევრები ვენაში ირანთან მოლაპარაკებებს აწარმოებენ. „ჰამასის“ მიერ ისრაელის წინააღმდეგ განხორციელებული ბოლოდროინდელი თავდასხმების ფონზე, აშშ-მა ყველა საჭირო ნაბიჯი უნდა გადადგას ირანის პასუხისმგებლობის საკითხის დასაყენებლად და ირანს სანქციები არავითარ შემთხვევაში არ უნდა შეუმსუბუქოს. ეს განსაკუთრებით მნიშვნელოვანია, რადგან ირანი მხარს უჭერს ტერორისტულ საქმიანობას შეერთებული შტატების უახლოესი მოკავშირის, ისრაელის წინააღმდეგ“, – ნათქვამია „რესპუბლიკელი“ სენატორების განცხადებაში.

„რესპუბლიკელი“ სენატორები ხაზგასმით აღნიშნავენ, რომ ირანი „ჰამასის“ ფინანსური და მატერიალური მხარდამჭერია.

„აშშ აქტიურ მოლაპარაკებებს აწარმოებს ირანთან და ირანმა, შესაძლოა, მილიარდობით დოლარი მიიღოს სანქციების შემსუბუქების შედეგად, რაც უეჭველად ხელს შეუწყობს ირანის მხარდაჭერას „ჰამასისა“ და სხვა ტერორისტული ორგანიზაციების მიმართ, რომლებიც თავს ესხმიან ამერიკელებს და ჩვენს მოკავშირეებს. ჩვენ მოგიწოდებთ, დაუყოვნებლივ შეწყვიტოთ მოლაპარაკებები ირანთან და მკაფიოდ განაცხადოთ, რომ სანქციების შემსუბუქება არ მოხდება. ეს ნაბიჯი ცხადყოფს ჩვენი რეგიონის უახლოესი მოკავშირისადმი და ჩვენი უსაფრთხოების ინტერესებისადმი მტკიცე ერთგულებას“, – განაცხადეს „რესპუბლიკელმა“ სენატორებმა.