ფაშინიანის მთავრობამ დაამტკიცა კანონპროექტი, რომელიც სომხეთში არსებული ყველა მობილური ტელეფონის მფლობელთან დაკავშირებული ცენტრალიზებული მონაცემთა ბაზის შექმნას ითვალისწინებს. ამის შესახებ ინფორმაცია მედიაში ვრცელდება.
მთავრობის განცხადებით, სისტემა მიზნად ისახავს ჩრდილოვანი ეკონომიკის წინააღმდეგ ბრძოლას, უკანონოდ იმპორტირებული ტელეფონების გაყიდვის აღკვეთასა და მობილური ტელეფონების ქურდობის შემცირებას. წინადადების თანახმად, თითოეული ტელეფონი დარეგისტრირდება მისი IMEI ნომრის მიხედვით და დაუკავშირდება მფლობელის ვინაობას, ასევე იმ SIM ან eSIM-ბარათებს, რომლებიც ამ მოწყობილობაში გამოიყენება.
ინიციატივის საბოლოოდ დამტკიცების შემთხვევაში, მონაცემთა ბაზა შესაძლებელს გახდის დადგინდეს, ვინ იყენებს კონკრეტულ მობილურ ტელეფონს. გარდა ამისა, მონაცემთა ბაზის ადმინისტრატორს ექნება საშუალება, შეგროვებული ინფორმაციის საფუძველზე სახელმწიფო და ადგილობრივი ხელისუფლების ორგანოებს, ხოლო გარკვეულ შემთხვევებში, კერძო სუბიექტებსაც, სხვადასხვა ციფრული მომსახურება გაუწიოს.
წინადადებამ შეშფოთება გამოიწვია კონფიდენციალურობის, კიბერუსაფრთხოების და ინფორმაციის სამომავლო გამოყენების შესახებ. მიუხედავად იმისა, რომ მონაცემთა ბაზის დანერგვა ოფიციალურად ემსახურება უკანონო იმპორტისა და ტელეფონების ქურდობის წინააღმდეგ ბრძოლას, კანონის მიღების შემთხვევაში შეიქმნება ერთიანი სისტემა, რომელიც მილიონობით მომხმარებლის პირად და მოწყობილობასთან დაკავშირებულ ინფორმაციას გააერთიანებს. კონფიდენციალურობის უფრო ძლიერი დაცვის მომხრეები ამტკიცებენ, რომ როგორც კი ასეთი ბაზა შეიქმნება, პრაქტიკულად აღარ იარსებებს ეფექტიანი ბარიერი, რომელიც მის გამოყენებას თავდაპირველი მიზნებისა და დანიშნულების ფარგლებში შეაკავებს.
არსებობს ასევე პრაქტიკული ხასიათის შეშფოთებაც. მობილური ოპერატორები მოწყობილობების გადამოწმებისთვის ამ ცენტრალიზებულ მონაცემთა ბაზაზე იქნებიან დამოკიდებული, რაც ნიშნავს, რომ ტექნიკურმა გაუმართაობამ შესაძლოა, ქსელის მუშაობის ნაწილობრივი შეფერხება გამოიწვიოს. ამასთანავე, მონაცემთა ბაზა ჰაკერებისთვის განსაკუთრებით მიმზიდველი სამიზნე გახდება, რადგან ის მილიონობით მომხმარებლის შესახებ სენსიტიურ ინფორმაციას შეიცავს.
მთავრობა ამტკიცებს, რომ ახალი სისტემა მობილური ტელეფონების ქურდობასთან ბრძოლას მნიშვნელოვნად შეუწყობს ხელს. თუმცა, სხვები ეჭვქვეშ აყენებენ ამ მექანიზმის ეფექტიანობას. მათი თქმით, დაზარალებულებს უკვე მრავალი წელია შეუძლიათ პოლიციას თავიანთი ტელეფონის IMEI ნომერი მიაწოდონ, თუმცა მოპარული მოწყობილობების აღმოჩენა და დაბრუნება მაინც ძალიან იშვიათად ხდება.