„პოლიტიკური ქამელეონები“ – გია აბაშიძე „ლელოს“ ახალ ფრაქციაში გადასულ დეპუტატებზე

657
წაკითხვა/ნახვა
რეკლამა -------------------- IMG.GE

ეს მრავალპარტიაგამოცვლილი პოლიტიკური ქამელეონები, დღესაც პოლიტიკურ ავანსცენაზე არიან, ეს კი მიუთითებს იმაზე, რომ ოპოზიციის დიდ ნაწილში პოლიტიკური კრიზისია – ასე შეაფასა „რეზონანსთან” ანალიტიკოსმა აგია აბაშიძემ ახალი ოპოზიციური საპარლამენტო ფრაქცია „ლელო – პარტნიორობა საქართველოსთვის”, რომელშიც პარტია „ლელოს” წევრებთან ერთად, სალომე სამადაშვილი, არმაზ ახვლედიანი და შალვა შავგულიძე გაერთიანდნენ.

საპარლამენტო ფრაქციის თავმჯდომარე ბადრი ჯაფარიძე იქნება, მისი მოადგილე კი სალომე სამადაშვილი. ფრაქციაში იქნებიან ბადრი ჯაფარიძე, მამუკა ხაზარაძე, დავით უსუფაშვილი, ანა ნაცვლიშვილი, სალომე სამადაშვილი, არმაზ ახვლედიანი და შალვა შავგულიძე. მათ არ შეუერთდა დავით ბაქრაძე.

„ყველა ხვდება იმ კვალიფიკაციას და დიდ ენერგიას, რომლითაც ჩვენ შემოვედით პარლამენტში იმისთვის, რომ მივიყვანოთ ბოლომდე შარლ მიშელის დოკუმენტი,” – ამის შესახებ „ლელო საქართველოსთვის” ლიდერმა მამუკა ხაზარაძემ ახალი ფრაქციის დაანონსების შემდეგ განაცხადა. მისი თქმით, საპარლამენტო ფრაქცია „ლელო – პარტნიორობა საქართველოსთვის” იქნება გარანტია, რომ მოქალაქეების ხმა საქართველოს უმაღლეს ორგანოში იყოს წარმოდგენილი.

ანალიტიკოსი გია აბაშიძე ფრაქციის წევრებს „მრავალპარტიაგამოცვლილ პოლიტიკურ ქამელეონებს” უწოდებს და აცხადებს, რომ ახალი ოპოზიციური საპარლამენტო გაერთიანების გარშემო ბევრი კითხვები აქვს.

„ისევე როგორც საზოგადოების დიდ ნაწილს, იმ წამსვე შეკითხვა მებადება, ეს ექვსი თვე რას აკეთებდნენ და რაში დახარჯეს? ესაა საკითხავი. ესენი ეძახდნენ ბოიკოტს, მაგრამ აცდენდნენ პარლამენტს, ხელფასს მაინც იღებდნენ და ბოლოს შევიდნენ.

„ამ ფრაქციასთან დაკავშირებით კიდევ მეორე შეკითხვაცაა, საქართველოში როდემდე უნდა გაგრძელდეს მრავალპარტიაგამოვლილ პოლიტიკოსთა ავანსცენაზე ყოფნა? საზოგადოებამ ყველაფერი იცის, სად იყო შალვა სავგულიძე, არმაზ ახვლედიანი?

„ეს მრავალპარტიაგამოცვლილი პოლიტიკური ქამელეონები, დღესაც პოლიტიკურ ავანსცენაზე არიან, ეს კი მიუთითებს იმაზე, რომ ოპოზიციის დიდ ნაწილში პოლიტიკური კრიზისია, მათ იმის უნარი არ აქვთ, რომ ახალი პოლიტიკური წონადი პიროვნებები წარმოაჩინონ, როგორც საპარლამენტო სიებისთვის, ასევე მერწმუნეთ ადგილობრივ თვითმართველობის არჩევნებშიც იგივე მოხდება.

„რაც შეეხება „ლელოს”, კიდევ ერთი შეკითხვა იბადება, შეძლებს კი ეს პარტია სააკაშვილის ჩრდილიდან საბოლოოდ გამოსვლას? დაველოდოთ მათი ქმედებებიდან გამოჩნდება, ვისურვებდი, რომ კონსტრუციული ოპოზიციური პარტია იყოს და არა დესტრუქციით დაკავებული, როგორც ეს „ნაცმოძრაობას” ახასიათებს.

„ეს ჯანსაღი ოპოზიციური აქტივობა ევროკავშირის აქტიური ჩართულობის შედეგია, თორემ მანამდე, ოპოზიციიდან ეს პარტიები პარლამენტში შესვლას არ აპირებდნენ და ფსევდო ბოიკოტის იდეა მოიგონეს, რომელიც უმეტესობამ თავიდანვე ვიცოდით, რომ ეს ფიაკოსთვის იყო განწირული. იმიტომ რომ შეუძლებელია, „ნაცმოძრაობა” და მასზე მიტმასნილი პოლიტიკური პარტიები თავიანთ პოლიტიკურ აქტივობებში თანმიმდევრული და ლოგიკური იყვნენ. ოპოზიციურ სპექტრს კი კიდევ ერთხელ ვუსურვებ, რომ სააკაშვილის მოჯადოვებულ პოლიტიკურ სივრცეს გასცდნენ, მათთვის მომავალში უკეთესი იქნება.

„ნაცმოძრაობაში” კი დაქსაქსულობა კვლავ გრძელდება, შევხედავთ ვინ გარეთ დარჩება, ვინ პარლამენტში შევა, მაგრამ როცა მისი მეთაური სააკაშვილია, მთლად მშვიდი ვითარება ვერ იქნება, ვერც პარლამენტში, ვერც პოლიტიკაში. მერწმუნეთ, არაა გამორიცხული უახლოეს მომავალში მათ სხვა პროვოკაციული ქმედებები კიდევ სცადონ, თუნდაც პარლამენტის დერეფნებში და თუნდაც სხდომათა დარბაზში, ეს მათ ახასიათებთ, მანამდეც გაუკეთებიათ და შეცდომა იქნება იმაზე ფიქრი, რომ ეს პარტია შეიცვალა და კლასიკური პროევროპული დასავლური პარტია გახდა, ესაა ილუზია, ისინი სამწუხაროდ სააკაშვილის ჩრდილქვეშ არიან,” – განაცხადა აბაშიძემ.

კომენტარები
რეკლამა
მოწონება