დიდუბის რაიონის გამგეობა ამ ეტაპზე საგზაო ინფრასტრუქტურის განახლებას დიღმის მასივის III კვარტალში ახორციელებს, სადაც კომპანია „ჯორჯიან უოთერ ენდ ფაუერმა“ მიწისქვეშა კომუნიკაციების რეაბილიტაციის მასშტაბური სამუშაოები უკვე დაასრულა.
პროექტის ფარგლებში მიმდინარეობს სანიაღვრე ქსელის მოწყობა, რის შემდეგაც ტერიტორიაზე ასფალტის ახალი საფარი დაიგება. სამუშაოები 4 200 კვ.მ ფართობზე ხორციელდება, ხოლო პროექტის ღირებულება 632 000 ლარს შეადგენს. განხორციელებული სამუშაოები მნიშვნელოვნად გააუმჯობესებს საგზაო ინფრასტრუქტურას და ადგილობრივი მოსახლეობისთვის გადაადგილებას უფრო უსაფრთხოსა და კომფორტულს გახდის.
მიმდინარე სამუშაოებს ადგილზე დიდუბის რაიონის გამგებელი დავით გელოვანი და თბილისის საკრებულოს დიღმის მასივის მაჟორიტარი დეპუტატი შოთა ქევხიშვილი გაეცნენ. მათ, ადგილობრივ მოსახლეობასთან შეხვედრისას პროექტის მიმდინარეობისა და დაგეგმილი სამუშაოების შესახებ ისაუბრეს.