ხელვაჩაურის მუნიციპალიტეტში იუსტიციის სახლი გაიხსნა.
იუსტიციის სახლის გახსნის ღონისძიებაზე საქართველოს პრემიერ-მინისტრმა ირაკლი კობახიძემ, აჭარის მთავრობის თავმჯდომარემ სულხან თამაზაშვილმა, იუსტიციის მინისტრმა პაატა სალიამ და იუსტიციის სახლის თავმჯდომარემ ვახტანგ ჟვანიამ შეკრებილებს სიტყვით მიმართეს.
სულხან თამაზაშვილმა სიტყვით გამოსვლისას აღნიშნა, რომ პროექტის განხორციელება, ახალი სამუშაო ადგილების შექმნასთან ერთად, მუნიციპალიტეტში სოციალური სერვისების ხელმისაწვდომობას გაზრდის.
,,ხელვაჩაურის მუნიციპალიტეტში ახალი იუსტიციის სახლის გახსნა ნიშნავს მეტ ხელმისაწვდომობასა და კომფორტს ადგილობრივი მოსახლეობისთვის. აღსანიშნავია, რომ ამ პროექტის განხორციელებამ მუნიციპალიტეტში შექმნა ახალი სამუშაო ადგილები. რაც, რა თქმა უნდა, დადებითად აისახება მოსახლეობის სოციალურ-ეკონომიკური მდგომარეობის გაუმჯობესებაზე. მე მინდა მადლობა გადავუხადო იუსტიციის მინისტრს და იუსტიციის სახლის თითოეულ თანამშრომელს, ვინც წვლილი შეიტანა პროექტის განხორციელებაში. ეს არის კიდევ ერთი მნიშვნელოვანი ნაბიჯი რეგიონის კიდევ უფრო მეტად განვითარებისთვის. დღეს აჭარის ავტონომიური რესპუბლიკა ვითარდება არა მხოლოდ ინფრასტრუქტურულად, არამედ ინსტიტუციურადაც.
პარალელურად, მიმდინარეობს მასშტაბური პროექტები საგზაო ინფრასტრუქტურის, სოციალური თუ საგანმანათლებლო მიმართულებებით. ეს არის სისტემური პროცესი, რომელსაც მოაქვს რეალური შედეგები. ჩვენი ამოცანაა, რომ თითოეულმა მოქალაქემ ყოველდღიურ ცხოვრებაში იგრძნოს ეს კეთილდღეობა და შედეგები,“ – განაცხადა აჭარის მთავრობის თავმჯდომარემ.
ხელვაჩაურის ახალი იუსტიციის სახლი რეგიონში რიგით მეცხრეა და მისი გახსნის შემდეგ იუსტიციის სახლები აჭარის ყველა მუნიციპალიტეტში იქნება ხელმისაწვდომი.
მთავრობის წარმომადგენლებმა ახლად გახსნილი იუსტიციის სახლი დაათვალიერეს.