სპეციალური პენიტენციური სამსახური კიდევ ერთ განცხადებას ავრცელებს და ეხმიანება ტელეკომპანია “ფორმულის” გავრცელებულ ინფორმაციას, თითქოს, 5 თებერვალს, ირაკლი ღარიბაშვილი, შვილის დაბადების დღესთან დაკავშირებით დროებით გაუშვეს.
“პენიტენციური სამსახურის ცნობით, სახალხო დამცველის წარმომადგენელმა ნახა ციხის სამეთვალყურეო კამერის უწყვეტი ჩანაწერები და ამის შემდეგ, მან დაადასტურა, რომ ყოფილ პრემიერს, 5 თებერვალს არ დაუტოვებია ციხე.
ტელეკომპანია “ფორმულას” მიერ გავრცელებულ ცრუ ინფორმაციასთან დაკავშირებით, თითქოს მსჯავრდებულმა ირაკლი ღარიბაშვილის ოჯახის წევრის დაბადების დღეზე პენიტენციური დაწესებულება დროებით დატოვა, გვსურს, საზოგადოებას მივაწოდოთ დამატებითი ინფორმაცია.
სპეციალური პენიტენციური სამსახურის მიერ გავრცელებული განცხადების შემდეგ, საქართველოს სახალხო დამცველის წარმომადგენელმა ნახა მსჯავრდებულ ირაკლი ღარიბაშვილის საკანში ვიდეომეთვალყურეობის შედეგად გადაღებული უწყვეტი ვიდეომასალა, რის შემდეგაც სახალხო დამცველის წარმომადგენელმაც დაადასტურა, რომ მსჯავრდებულს პენიტენციური დაწესებულება არ დაუტოვებია.
აღნიშნული ფაქტი უტყუარად ადასტურებს, რომ ტელეკომპანია “ფორმულას” მიერ გავრცელებული ინფორმაცია იყო მორიგი სიცრუე, რომელიც მიზნად ისახავდა საზოგადოების შეცდომაში შეყვანას.”-ნათქვამია პენიტენციური სამსახურის განცხადებაში.