მნიშვნელოვანი დღე იყო მადრიდში. სამიტზე მიღებული დოკუმენტები დაეხმარება საქართველოს შემდგომი ინტეგრაციის პროცესში, – ამის შესახებ ილია დარჩიაშვილმა მადრიდში, ნატოს სამიტზე განაცხადა. საქართველოს საგარეო საქმეთა მინისტრის თქმით, სამიტის მონაწილეებმა საქართველოს მიმართ განსაკუთრებული დამოკიდებულება დააფიქსირეს.
„განსაკუთრებით უნდა აღვნიშნოთ, რომ საბჭოს სხდომის ფარგლებში განსაკუთრებული დამოკიდებულება იყო საქართველოს მიმართ გამოვლენილი. თითქმის ყველა ქვეყანა გამოეხმაურა ჩვენი ქვეყნის ევროატლანტიკურ ინტეგრაციას – აშშ, საფრანგეთი, გერმანია, ევროკავშირის ძალიან ბევრი ქვეყანა და გამოირჩეოდნენ მხარდამჭერი განცხადებებით. ძალიან მნიშვნელოვანია, რომ ასეთი ერთიანობა იყო საქართველოს მისამართით. ნატოს სტრატეგიულ კონცეფციაში ასახულია თანამშრომლობა პარტნიორებთან. ჩვენ გვექნება შესაძლებლობა ღია კარის პოლიტიკის ფარგლებში გავაგრძელოთ ინტენსიური ინტეგრაცია ნატოში“, – განაცხადა დარჩიაშვილმა.