სახელმწიფო ყველაფერს გააკეთებს იმისთვის, რომ რეალურად უზრუნველყოფილი იყოს იმ პირთა უსაფრთხოება, ვისაც საკუთარი პოზიციის გამოხატვის სურვილი აქვთ, – ამის შესახებ მიხეილ სარჯველაძემ „თბილისი პრაიდის“ მიერ დაგეგმილ კვირეულზე საუბრისას განაცხადა. საპარლამენტო უმრავლესობის წევრი აღნიშნავს, რომ საზოგადოება განსხვავებულ აზრს ძალადობრივი ფორმებით არ უნდა დაუპირისპირდეს.
„უნდა მივეჩვიოთ ისე ცხოვრებას, რომ მოგვწონს თუ არ მოგვწონს სხვა პირთა მიერ გამოხატული პოზიცია, არცერთ შემთხვევაში არ შეიძლება საკუთარ თავს უფლება მივცეთ ამას ძალადობრივი ფორმებით აღვუდგეთ“, – განაცხადა სარჯველაძემ.
მანამდე, პარლამენტში საპროცედურო კომიტეტის სხდომაზე მოქალაქეთა ჯგუფი კანონპროექტის ინიცირების უფლებას ითხოვდა, რომლის მიხედვითაც ქვეყანაში სექსუალური ნიშნით შეკრებები უნდა აკრძალულიყო, თუმცა ამ ინიციატივაზე უარი მიიღეს.
შინაგან საქმეთა სამინისტრომ კი „თბილისი პრაიდის“ კვირეულის ფარგლებში დაანონსებულ ღონისძიებებთან დაკავშირებით პრევენციული ღონისძიებების შესახებ განცხადება გაავრცელა, რომელშიც აღნიშნულია, რომ უწყების წარმომადგენლები მუდმივ კომუნიკაციაში იმყოფებიან ღონისძიების ორგანიზატორებთან.