მე-17 პენიტენციურ დაწესებულებაში მყოფმა მსჯავრდებულებმა კომერციული საქმიანობის განვითარების, ორგანიზებისა და მართვის შესახებ ცოდნა გაიღრმავეს, – ინფორმაციას იუსტიციის სამინისტრო ავრცელებს.
უწყების ცნობით, მსჯავრდებულებს სოციალური მეწარმოების ტრენინგზე მათ შესაძლებლობა ჰქონდათ, იდეის დამუშავებისა და კომერციული საქმიანობის განხორციელების შესახებ დეტალური ინფორმაცია მიეღოთ.
სასწავლო კურსის დასრულების შემდეგ, პროექტში ჩართულ მსჯავრდებულებს სერტიფიკატები იუსტიციის მინისტრის მოადგილემ, ბუბა ლომუაშვილმა და მსჯავრდებულთა პროფესიული მომზადებისა და გადამზადების ცენტრის დირექტორმა თამთა დემურიშვილმა გადასცეს.
ტრენინგი მსჯავრდებულთა პროფესიული მომზადებისა და გადამზადების ცენტრის ინიციატივითა და როტარი კლუბი რუსთავის მხარდაჭერით განხორციელდა. მსჯავრდებულებმა ასევე, ტრენინგის ფარგლებში, ინიცირებული და ჩამოყალიბებული ბიზნეს იდეები წარადგინეს.