გურიის მხარეში სახელმწიფო რწმუნებულმა გიორგი ღურჯუმელიძემ, მოადგილეებთან და ადგილობრივი ხელისუფლების წარმომადგენლებთან ერთად, საქართველოს ტერიტორიული მთლიანობისთვის დაღუპულ მებრძოლთა მემორიალი და აგვისტოს ომში დაღუპული გმირების საფლავები ყვავილებით შეამკო.
„დღეს გავიხსენეთ და პატივი მივაგეთ 2008 წლის აგვისტოს ომის დროს დაღუპული სამხედროების და პოლიციელების ხსოვნას. მათ შორის 9 გმირის სიცოცხლე შეეწირა სამშობლოს დაცვას გურიის რეგიონიდან. ქედს ვიხრით დაღუპულთა წინაშე და ვუსამძიმრებთ გარდაცვლილთა ოჯახებს“, – აღნიშნა სახელმწიფო რწმუნებულმა.
მთავრობის განკარგულებით, საქართველოს აფხაზეთისა და ცხინვალის რეგიონების უკანონო ოკუპაციის მიზნით, რუსეთის ფედერაციის მიერ, საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივის მიგების ნიშნად, სახელმწიფო დროშები დაშვებულია გურიის რეგიონის ყველა ადმინისტრაციული ორგანოს შენობაზე.