იუსტიციის მინისტრის მოადგილე ბექა ძამაშვილი „ძლიერი საქართველოს“ განცხადებას გამოეხმაურა ანაკლიის პორტის საქმეზე ვაშინგტონის არბიტრაჟის გადაწყვეტილების შესახებ.
„ჩვენი მხრიდან გავრცელდა განცხადება, რა გადაწყვიტა არბიტრაჟმა. საუბარი იყო იმაზე, რომ სახელმწიფო იყო მართალი, მთელი პასუხისმგებლობა ეკისრებოდათ ინვესტორებს, მომჩივნებს, და მათ ერთადერთი, რაც გააკეთეს, დაიწყეს მათი პარტნიორისგან თუ ყოფილი პარტნიორისგან დისტანცირება. ფაქტობრივად, ეს განცხადება ნიშნავს იმას, რომ როდესაც ამდენ დავას წააგებენ, ერთადერთი, ისღა დარჩენიათ, რომ დისტანცირდნენ. თითქოს მათი ინვესტორი, მათი პარტნიორი იყო ყველაფერში პასუხისმგებელი“, – განაცხადა იუსტიციის მინისტრის მოადგილემ.
ბექა ძამაშვილმა აღნიშნა, რომ „ძლიერი საქართველოს“ ლიდერები ჩართული იყვნენ საარბიტრაჟო დავის პროცესში.
„ჩვენ ძალიან კარგად გვახსოვს მათი მონაწილეობა განხილვებში, ალბათ, არ იტყვიან, რომ ამ განხილვებს ისინი, როგორც ტურისტები, ისე ესწრებოდნენ. აქამდე აცხადებდნენ, რომ 2 საერთაშორისო არბიტრაჟში აწარმოებდნენ დავას და დღეს, გადაწყვეტილების შემდეგ დისტანცირება ნიშნავს იმას, რომ ეს მარცხი მათთვის ძალიან მტკივნეულია“. – აღნიშნა ბექა ძამაშვილმა.