დიდი ბრიტანეთის საელჩომ იცის, რომ ამ დადგენილების ამოქმედების შემდეგ თავისუფლად შეეძლო, მიემართა საქართველოს მთავრობისთვის და თუ მის მიერ გაცემული გრანტი იყო ქვეყნის ინტერესებში, მასზე თანხმობას აიღებდა, მაგრამ საელჩომ ეს არ გააკეთა, – ამის შესახებ იურიდიულ საკითხთა კომიტეტის თავმჯდომარემ, არჩილ გორდულაძემ საქართველოს პირველი არხის გადაცემაში „დღის თემა“ განაცხადა.
„იმდენად კრიტიკულად მნიშვნელოვანი იყო გრანტის გაცემა, რომ რამდენიმე დღის მოთმენა შეუძლებელი იყო, რომ შესაბამისი თანხმობისთვის მიემართა საქართველოს მთავრობისთვის და ამიტომ მიიღეს გადაწყვეტილება, რომ გაცემას წყვეტენ. შეგვიძლია, გავიხსენოთ საფრანგეთის საელჩოს მოქმედება, როდესაც გრანტების შესახებ კანონში ცვლილება მიიღებოდა მესამე მოსმენით, ვიდრე მიიღებდა საქართველოს პარლამენტი, რამდენიმე წუთით ადრე საფრანგეთის საელჩომ გასცა გრანტები და მისცა კოლექტიური „ნაცმოძრაობის“ ორ წარმომადგენელს. საელჩოს თუ ჰქონდა კეთილსინდისიერი მიზნები, რომ გრანტის დანიშნულებაც იყოს ქართველი ხალხის ინტერესების შესაბამისი, რატომ არ მოითმინა, მაგალითად, ერთი დღე, ორი დღე და რატომ არ მიმართა მთავრობას შესაბამისი თანხმობის მისაღებად? პარლამენტის თავმჯდომარე, შალვა პაპუაშვილი ხშირად ამბობს ხოლმე, რომ აქ სულელი ნამდვილად არავინ არის და არავის აქვს აზროვნების პრობლემა. კონკრეტულ გრანტის როდესაც გასცემს, დონორ ორგანიზაციას აქვს კეთილი ზრახვები, მას რა თქმა უნდა, არც მთავრობისგან თანხმობის მიღება არ გაუჭირდება“, – განაცხადა არჩილ გორდულაძემ.