22-28 აპრილს, კვიპროსის ქალაქ ლიმასოლში გაიმართა საერთაშორისო “სამბოს” ჩემპიონატი, რომელშიც ხელვაჩაურის მუნიციპალიტეტის სასპორტო სკოლის სპორტსმენებმა მნიშვნელოვანი გამარჯვება მოიპოვეს და საქართველო ღირსეულად წარადგინეს. სამმა ნიჭიერმა სპორტსმენმა, თავიანთი შეუპოვრობით, მონდომებითა და მაღალ დონეზე შესრულებული ორთაბრძოლებით, ბრინჯაოს მედლები დაიმსახურეს.
ნინი დარჩია — 54 კგ წონით კატეგორიაში
ანანო კინწურაშვილი — 59 კგ წონით კატეგორიაში
ელენე ქებაძე — +80 კგ წონით კატეგორიაში
ამასთან დაკავშირებით, ხელვაჩაურის მერი ზაზა დიასამიძე სოციალურ ქსელში მილოცვის ტექსტს აქვეყნებს:
“ეს წარმატება კიდევ ერთხელ უსვამს ხაზს ხელვაჩაურის მუნიციპალიტეტის სპორტულ განვითარებასა და ახალგაზრდების დიდ პოტენციალს. გულწრფელად მიხარია და ვულოცავ ჩვენს სპორტსმენებს ამ საამაყო შედეგს და ვუსურვებთ მათ კიდევ უფრო დიდ წარმატებას.”– წერს ზაზა დიასამიძე.
