ამერიკული „ფარას“ ანალოგის განხილვას საქართველოს პარლამენტი მომდევნო კვირას იწყებს. მომავალ კვირასვე დაიწყება მედიის შესახებ კანონპროექტის განხილვა.
საკითხს ჟურნალისტებთან საუბრისას იურიდიულ საკითხთა კომიტეტის თავმჯდომარის პირველი მოადგილე, საპარლამენტო უმრავლესობის წევრი თორნიკე ჭეიშვილი გამოეხმაურა.
„საპარლამენტო განხილვებისას დაიწყება მსჯელობა იმაზე, რომ მოხდეს ამ საკანონმდებლო აქტის, პროექტის ქართულ რეალობასთან ადაპტირება. საკუთრივ „ფარა“, ეს არის თავისი რეგულირებით საკმაოდ ხისტი ნორმატიული დოკუმენტი.
მედიის ნაწილში აუცილებლად უნდა აღვნიშნოთ ის, რომ აქამდე არსებული მოდელი, რომელიც არსებითად თვითრეგულირებაზე აკეთებდა აქცენტს, არ აღმოჩნდა საკმარისად ეფექტიანი. ჩვენი საზოგადოება ამ მოდელის მოქმედების პირობებში ვერ იყო დაცული, თუნდაც დეზინფორმაციის ძალიან აქტიური ტირაჟირებისგან მთელ რიგ შემთხვევებში, სიძულვილის ენისგან. სამომავლოდ, მედია გარემო კიდევ უფრო მეტად იქნება გაჯანსაღებული და გაწმენდილი სხვადასხვა მავნე მინარევებისგან“, – აღნიშნა თორნიკე ჭეიშვილმა.