თუ ვინმეს ამის გამოყენება უნდოდა სპეციალურად, რომ საქართველოს შესახებ ცუდი რეზოლუცია დაეინიცირებინათ და შემდეგ მათი პარტიული მეგობრების მხარდაჭერით ეს რეზოლუცია, ნებისმიერი საბაბი შეიძლება იყოს გამოყენებული ამ მიზნისთვის, – ამის შესახებ პარლამენტის საგარეო ურთიერთობათა კომიტეტის თავმჯდომარე, ნიკოლოზ სამხარაძემ „ქრონიკაში“ განაცხადა.
„1 თვის წინ ევროსაბჭოს მიერ მიღებულ რეზოლუციაში ზუსტად იგივე 27 ქვეყანა მონაწილეობს და იქაც საპარლამენტო დელეგაციები არიან და ყველამ მისცა ხმა. ის რეზოლუცია იყო ძალიან დიდი შრომისა და კვლევის შედეგი. მისი ავტორები დაახლოებით 9 თვე წერდნენ ამ ანგარიშს. შეხვდნენ ყველას საქართველოში. შესაბამისად, ეს არის ფუნდამენტური ნაშრომი. იმ რეზოლუციაში ეწერა, რომ მიუხედავად ნაკლოვანებებისა, საქართველომ იმდენად დიდ პროგრესს მიაღწია, თითქმის უკვე მზად არის, რომ პოსტმონიტორინგის ეტაპზე გადავიდეს. 1 თვის შემდეგ, ჩვენ ვხედავთ, რომ ევროპარლამენტის რეზოლუციაში სრულიად საპირისპირო სურათი გვაქვს. ტექსტში იმდენი ფაქტობრივი უზუსტობა და შეცდომაა, რომ თვითონ ტექსტიდან ჩანს, რომ ზერელე დამოკიდებულებაა ამ რეზოლუციის მიმართ“, – განაცხადა სამხარაძემ.