წაგებული ომის შემდეგ ფაქტობრივად ყველა სტრატეგიული ობიექტი რომ გადაუფორმეს რუსეთის სახელმწიფო მფლობელობაში არსებულ კომპანიებს, ზუსტად ეს ნიშნავს რუსეთის გავლენების გაზრდას საქართველოში და ჩვენ შემთხვევაში ამის მეასედი მაგალითიც კი ვერავინ მოიყვანა, – განაცხადა ფრაქცია „ქართული ოცნების“ თავმჯდომარის მოადგილემ ლევან მაჭავარიანმა. დეპუტატი გამოეხმაურა ოპონენტების განცხადებებს იმის შესახებ, თითქოს „ქართული ოცნება“ რუსეთის საქმეს აკეთებს.
„რუსეთს რომ ტერიტორიები გადააბარეს და შემდეგ ეს ყველაფერი რომ „გაუპრავეს“ რეზოლუციებითა და ტალიავნის დასკვნით, ამის შემდეგ კი რუსეთს რომ მისცეს მსოფლიო სავაჭრო ორგანიზაციაში გასაწევრიანებლად საქართველოს ხმა, რომელიც იყო გადამწყვეტი, ეს არის რუსული საქმე. წაგებული ომის შემდეგ ფაქტობრივად ყველა სტრატეგიული ობიექტი რომ გადაუფორმეს რუსეთის სახელმწიფო მფლობელობაში არსებულ კომპანიებს, ზუსტად ეს ნიშნავს რუსეთის გავლენების გაზრდას საქართველოში და ჩვენ შემთხვევაში, მსგავსი, ამის მეასედი მაგალითიც კი ვერავინ მოიყვანა. ეს არის ბინძური პროპაგანდა. როდესაც პოლემიკაში შედიხარ ადამიანთან და ეკითხები – მითხარი, რუსული რა გავაკეთე, ვერავინ ვერაფერს გეუბნება და ამბობენ, ასე იძახიანო; ვიღაცამ შეიძლება თეთრზე შავი გითხრას და ეს არ უნდა დაიჯერო“, – აღნიშნა მაჭავარიანმა.