ბათუმის მერის მოადგილე სოფო ხალვაში, მომღერალ ავთო აბესლამიძის განცხადებას ეხმაურება.
Imedinews-თან საუბრისას სოფო ხალვაში აცხადებს, რომ მისთვის გაუგებარია რას გულისხმობს აბესლამიძე, რადგან ბათუმის მერიას მისთვის გალაკონცერტში მონაწილეობა არ შეუთავაზებია.
„საახალწლო გალა პროგრამა შედგენილია და ავთო აბესლამიძე არ არის და არც ყოფილა მასში წარმოდგენილი. 31 დეკემბრის გალაკონცერტზე შეთავაზება მის მიმართ არ გვქონია“, – განაცხადა სოფო ხალვაშმა.
მომღერალმა ავტო აბესლამიძემ სოციალურ ქსელში დაწერა, რომ ის პროტესტის ნიშნად ბათუმში, საახალწლო კონცერტში მონაწილეობას არ მიიღებს.
ქვეყანაში შექმნილი სიტუაციიდან გამომდინარე, არ ვთვლი, რომ ჩემი საახალწლო კონცერტში მონაწილეობის მიღება იქნება მართებული! ამიტომ, 31-ში, ბათუმში საახალწლო გალა კონცერტში მონაწილეობის მიღებაზე ვამბობ უარს“,- დაწერა ავთო აბესლამიძემ.