ამნისტიის კანონი მისი ძალაში შესვლისთანავე დაუყოვნებლივ გავრცელდება ათასზე მეტ პატიმარზე, – განაცხადა მამუკა მდინარაძემ.
საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა და ფრაქცია „ქართული ოცნების“ თავმჯდომარემ ასევე განმარტა, რომ გარდა ამისა, ამნისტია ეტაპობრივად შეეხება 5 ათასზე მეტ პატიმარს.
„საერთო ჯამში ამნისტია ეხება ექვს ათასზე მეტ ადამიანს. ეს არის მასშტაბური ამნისტია და ყველა შესაძლო ვერსია, რაც მსჯავრდებული ადამიანის რესოციალიზაციის მიზნებში ჯდება, მაქსიმალურად არის გათვალისწინებული“, – აღნიშნა მან.
საპარლამენტო უმრავლესობის ლიდერმა ამნისტიისადმი ოპოზიციის ნაწილის დამოკიდებულებასაც გაუსვა ხაზი.
„სპეკულირებენ ჩვენი ოპონენტები, რომ ეს არის გამოშვებული პატიმრებისა და მათი ოჯახის წევრების ხმებისთვის [გამოცხადებული ამნისტია]. როდესაც ოპოზიცია არ მონაწილეობს დღეს ამნისტიის განხილვაში, ამას სხვა დამატებით მიზეზი აქვს. მათ უნდოდათ, რომ ამაში მიეღოთ მონაწილეობა, მაგრამ სინამდვილეში ლგბტ პროპაგანდის წინააღმდეგ მიმართულ კანონს დაემალნენ, იმიტომ რომ „ლელო“ – „ნაცმოძრაობის“ ე.წ. ერთ-ერთი ფრთა, ვერ ჩამოყალიბდა – ეკლესიას, ტრადიციულ ღირებულებებს, რწმენას და კონსტიტუციაში მათი როლის გაძლიერებას დაუჭიროს მხარი თუ ლგბტ პროპაგანდის წინააღმდეგ არ მისცემს ხმა. ამიტომ ისინი აბნეულები არიან ახლა თავიანთ მესიჯებში და უბრალოდ „ნაციონალურმა მოძრაობამ“ და მათმა დანაყოფებმა (ყველამ არა, მაგრამ ძირითადმა ნაწილმა) ბოიკოტი გამოაცხადა იმიტომ, რომ ლგბტ პროპაგანდის წინააღმდეგ მიმართულ კანონთან დაკავშირებით არ დაეფიქსირებინა პოზიცია და ამასობაში ასცდნენ ამნისტიის კანონს“, – განაცხადა მდინარაძემ.