ირაკლი კობახიძე იმ დეპუტატების განცხადებებს ეხმაურება, რომლებიც მმართველ გუნდს საფრანგეთის პრეზიდენტის, ემანუელ მაკრონის წერილის გამო აკრიტიკებენ. ამ თემაზე „ქართული ოცნების“ თავმჯდომარემ „იმედის კვირაში“ ისაუბრა.
„მაკრონს თვითონ ედავებიან, მათ შორის უკრაინის ხელისუფლების წარმომადგენლები, მის პოზიციასთან დაკავშირებით რუსეთთან მიმართებაში. როცა მაკრონის ამ წერილს იყენებს ვიღაც, იმისთვის რომ ჩვენი პოზიცია გააკრიტიკოს, ეს აბსოლუტურად გაუგებარია. კიდევ ერთხელ ვიმეორებ, მათ არ აქვთ არანაირი ფაქტები“, – განაცხადა კობახიძემ.
„მნიშვნელოვანია, რომ თქვენმა ქვეყანამ მხარი დაუჭიროს სანქციების ევროპულ პოლიტიკას და ხელი შეუშალოს მოქმედი სანქციების რეჟიმის რუსეთის მიერ გვერდის ავლის მცდელობებს“, – აღნიშნულია მაკრონის წერილში, რომელიც მან საქართველოს პრეზიდენტს ქვეყნის დამოუკიდებლობის დღეს მისწერა.